2Ti 4 | MCQ | STEP | Na Godiho 'ee Jesu Keriso puni una'i a Ira naja'amarono 'waravu. Ijihuni maijaho Hura Kinia'e rene hi'iro'amajino ea ka'ene mai'u hijura 'ee kwamasahajija 'otua vetihuna.

2 Timothy 4

1 Na Godiho 'ee Jesu Keriso puni una'i a Ira naja'amarono 'waravu. Ijihuni maijaho Hura Kinia'e rene hi'iro'amajino ea ka'ene mai'u hijura 'ee kwamasahajija 'otua vetihuna. 2 'Enakúne Irijaho naja'amana. Vea 'aha ho vea 'aha pana kaivo maiji amairiara'amana. 'Ene ni'ajihe amairie najahe 'ee ira kisina ni'ajihi'i 'urarahe 'warame 'ee hami chochumano masuanu hiji'i hami najaha 'wara'amana. 3 Ijihuni maijaho vea mai'o rouna'omo pu vu'a nimaiji hehuna ura parenahuna kaivo pu najahi'ina nianaa roe puni ura ijí 'warave he'irono ataa apúsahuna. 4 'Ene pu nimaijaho ataa paapúsahuna kaivo ta'arohe mamiha sisei jihipuni ataa apúsahuna. 5 'Enakaivo uneunecha maho'o hami 'ajoara'amana. 'Ene 'unama kisinijija kairane namine ivenijarisi huni kaukara ijaho ve'amana. 'Enakaivo oni kaukara ka'ene Godira mahajaho ve para'amana. 6 Ijihuni maijaho na toa ijuri swasa puna'i vene niusekujuta. 'Ena'omo nara vahuni vea niroe apenu. 7 Na ajira ka'ene mamaiji 'arahuta. 'Enarejo iraka ka'ene nara vehunijaho niroe paranana. 'E'eju'e na nimaaroiji 'unaname hiju. 8 'Ena'omo vea túna'i Natohwijara ariramaa huni i'esa ka'ene ranavu'e nunijihuna'e namujaho 'otua veji'ina ariramaijara roamani veijino mihuna. 'Ene nanasu pana kaivo ea maho'o ka'ene Hura rohuniji oja mahajija 'u'o vajihuna.

Huni Vu'aruna

9 'Enakúne mako harura vene 'unama same nuni ro'amana. 10 Ijihuni maijaho Timasiho iviamaa ikehuni mwe'a ike oja maharena na ranamie Tesaronaikai va'ana. 'Ejume Kuresianisiho Karesia va'ana. 'Ejume Taitasiho Taramesiai va'ana. 11 'Enakaivo Rukura huhusu na hu'úmo hinu. 'Enakúne Maka aheve a hu'úmo ro'amana. Ijihuni maijaho hu kaukara vajakaho ni'ima'ura'e ni'ajihuna. 12 'Enakaivo Tichikasiho na ranavume Epasasi va'ana. 13 'Enakúne vea ka'ene a ro'amajaho nuni ateha ka'ene nara Turoasi Karipasi'i ranavujaho apene 'ee puka 'eke 'ee heha mama'ina 'aho'a ka'ene ijí navujija 'eka ro'amana. 14 'Ene Arekisanita ka'ene kapa'e venujara na niho'o ni'ima'ura'e ruariha paranana. 'Enakaivo Natohwijara hura vena kaja'ina'e eha ija'ina mahuna. 15 'Enakúne núra najahujaho hu harura niname 'warumu jihuna'e a orono hununa'ijaho hami 'ajo'ara'amana. 16 Nara amura'e 'otui aruvujaho ea pina na pani'ajihana kaivo ranamie varanavara. 'Ena'omo veje Hu pununa'a sisea pavwiha'amana. 17 'Enakaivo Natohwijara na hu'úmo namine Hura harura mihana. 'Ejumakame nuni vaji ira ikaho maho'o najahukame Jenitaru maho'o hejara. 'Ene na hanuha ka'ene ea inahi'ini jihuni ira vaji 'ena apenie ruva'iara. 18 Natohwijara sisea ani ani'ina vajijija ni'ajihe aherime Huni kwai akúpi 'ahi vahuna. Pinana mamaa ijaho aneja púsa pa'ana'e Huna. Ameni.

Túchamaa 'Ajoramujina

19 Pisirane 'ee Akwirane 'ee Onesiporasi oni kachi'inijija ijá 'ajora'amana. 20 Irasitasiho Koriniti hinu kaivo Turopimasi atamiji'i Mairitasi hinu. 21 'Enakúne marako 'unama same ro'eja'e iji'a atuata vea re'amana. Upurasira 'ajoravu'e Putenisine Rainasine 'ee Karotiane 'ee vwehu nuna ea maho'o ijipo 'ajoravu. 22 'Ene Natohwijaho oni 'aveniji'ine 'ee maiji vwihaniujaho a hu'úmuna.